36. De zwartkijker

A dag Frans! 't Es goe were he jongen
Jaja da wel Poliet, maar 't zit wakte in de lucht
En dat is niet goed voor de longen
E de zonne schijnt jong Frans zo'n schoon were
Zijde ziek misschien edde soms de griep?
Och Poliet jong 'k zie 'k ik altijd mijn pere
't Mankeerd mij niets hoor da niet
Maar 't kan nog komen he, den dag es nog nie om
Allee allee Frans, zie eens rondom ui en geniet
Poliet manneke toch! De wereld es vol gevaar
Straks stroomd de zee over, en tons al da water
Diene pol he jong, hij es helemaal aan 't melten daar
Maar Frans toch dat zal van onzen tijd niet zijn
Da zegde gij Poliet, maar de zonne schijnt toch fel
'k Ben zo jong niemeer he da ligt nie zo in mijn lijn
En ook he ken kanne nie zwemmen he jong
O ter tons azo nen salami komt mee al da water
Of hoe heet da ook were 't lig op mijn tong
Nee jong 'k he der geen goe oog in hoor
Toe te toe Frans, bij ons gebeurd dat toch niet
In onzen tijd slaan we er ons wel door
Omme maar gezond zijn he Frans 't es da die teld
Hja daar zegde wadde Poliet, omme gezond zijn
Vandage nog wel maar morgen liggen we al geveld
Allee allee Frans azo geen zwarte gedachten
Geniet van 't schoon were terwijl het er is he
Hja vent Poliet wa staat er ons nog al te wachten
E jamaar Frans voelde gij ui nui misschien ziek
Beneek Poliet, maar wa hangt er boven onze kop
En eigenlijk voel ik mij nui ook nie al te kwiek
Zie ne keer naar al die strepen in de lucht
Vliegmachienen langs alle kanten
Och manneke toch die lossen daar wa bucht
En al da ziekelijk stof damme moeten opeten
Daar staat wat te gebeuren jong, wacht maar af
In onzen tijd hemme dat toch noeit geweten
Nen appel smaakte toen naar nen appel waar
Maar mee al da sproeien es de goede smaak weg
Van al die zorgen verliest ne mens zijn haar
Maar Frans jong ge piekert gij veel te veel
O ja Poliet! Ge stond gisteren zo te hoesten
Awel dat es van al da stof gestuif in ui keel
Be nee jong Frans, 'k had mij verslikt man
Da was trouwens subiet over he vent
Awel van da stof he Poliet da komt ervan
Maar allee ik moet nui toch verder zulle
'k Moe op tijd 't huis zijn he, 't es haast noen
En ge weet mijn wijf es nogal een dulle
Allee dan Frans, laat de zon maar katoen geven
En tot ten naaste weke ne keer he jong
Hja Poliet jong, als we tons nog maar leven

Louis Victor, 2009