98. Zever en kolder

Zever en Kolder waren weer aan de wandel en vertelden holder de bolder
Je kon uit die twee niet veel normaals wijs worden want vertelden maar wat
De stomste verhalen disten ze zomaar op, ze heten da ook Zever en Kolder
Hun echte naam heb ik nooit gekent het waren twee oude knaspers waar
Ze waren niet slordig of vuil hoor maar ook niet echt modieus gekleed
En ze liepen ook wel eens met een stopelbaard en nou ja sluik haar
Als je dan toch eens met hen sprak bedotten ze u en ze vonden dat fijn
En als kind zou je wel eens gedacht hebben, kan dat nu of kan dat niet
Maar nee hoor, je kon ze niet vertrouwen, hun verhaaltje was maar schijn
Als ze zo met hun twee waren sloegen ze ernaar als een blinde naar een ei
Het kon hen geen moer schelen wat ze vertelden en ze hadden er nog lol in
Net zoals vandaag, ze waren dus aan de wandel langs de bossen en de hei
Zei Zever, vent gisteren hek ne toer tegen gekomen, ik zei nog goeiendag
Haja ge moe altijd beleeft zijn als nen Toer tegenkomt die hen macht hoor
Hem zelve koeste nie zien natuurlijk maar 't waren de gevolgen die ik zag
Maar hij zei mijnen naam es storm, en hij kwan daar azu afgewerveld waar
Hij hae al twee koeien meegepakt en die vlogen daar maar luid te loeien
En ineens begon het te regenene he vent van de melk he azo op mijn haar
En 'k peisdige 'k zalle der maar mijn haar mee wassen 't es nui toch nat
En Toer storm wervelde azo altijd maar van boeoeoeoe precies lijk een koe
Maar deur al de wrijven op mijne kop in diene melk wete wat in mijn haar zat
E luizen zeker lachte Kolder, want die beesten eten gairen melk he jong
Nee nee vent zei Zever, boter jong verse koeboter, wel ne halve kilo he man
En van die echte zuivere koeboter hoor 'k he der van geproeft op mijn tong
Hja 'k he ze natuurlijk meegedaan naar huis he 'k stak ze in mijne vestezak
En mee da lopen he vent kairende da altijd maar voort en kwam der altijd bij
En tegen da'k goe thuis ware haek er zeker drei kilo, echt azo ne hele pak
Maar om nui voort te vertellen he, Toer Storm was geweune meegekomen
Hij hae onderweg nog wa schapen opgeschept, en nog een ferm boerepaird
Maar wat hij tons deed jong, da zoeje in ui stoutste dromen nie willen dromen
Hij paktige daar alineens mijn konijnekot onder zijnen arm en hop de lucht in
Ge keunt wel peizen dak ik daar nie mee gedient ware he hoe zoeje zelve zijn
Ik riebe nui est genoeg he ik maaktige mij kwaad en 'k gaeve hem azo ne pin
Auw! Blies hij en spuwde meteen ne defel konijnekeutels in mijn gezicht waar
En hij was ter vandeure, mee al mijn konijnen waar, 'kae der maar zeven over
'k Stonne 'k ik daere, mee al die konijnenkeutels in mijn gewassen boterhaar
't Schijnd dat diene werveltoer tons maar naar Frankrijk op reize es gegaan
Mijn konijnenkot es ginder aan dienen groten toren blijven hangen die dinges
He er al wel van ghoord he, een groot ding hoor, hij zoe daar al een poze staan
Allee die gemaakt es van ne zekere Weifel zeker of hoe heetige dien vent ook
De mensen verschoten natuurlijk verschrikkelijk he, haja mee da konijnekot he
Al da stroot vloog daaruit en die keutels, 't was daar vaneigens ne dichte rook
Ge weet toch wa da Frankrijk es he Kolder, da ligt daar ergens buiten waar
Ge moe da zeker kennen want 't es veel groter dan mijnen lochtink zulle
Een ding es wel ambetant van die mensen ze spreken allemaele zo raar
Vaneigens wede'k dadde zei Kolder, waar dan al die rijke Franken weunen
En waar vroeger al die adeldinges weundigen he die gasten mee blauw bloed
Maar dinges dien zekere Voliëre, was dat den dienen niet die ze deed kreunen
Of was dat Guilio en Tine die ze de kop af deed, ze betrouwdigen ze niet echt
Ja wa wilde nui ook he, blauw bloed zeg, da es toch nie normaal voor ne mens
Awel daarvoren deden ze ook dood he ze vonden zij die blauwe gasten slecht
Ik peize ok me goe herinner dat die Voliere eigenlijk ne schrijver was in diene tijd
Of anders op nen ander tijd hoor, altijd tegendraads mee die blauwe gasten he
Was da Rabe Spiere niet die ze de bolle afdeed, maar 'tviel tegen tot zijn spijt
Hij deed er zoveel de bolle af dat ze er gans Parijs mee konden kaseien waar
Vandaar de name kinderkopkes he da zijn een soort kaseien da bestaat nog
Maar ja ze hen der dan toch geen straten mee gelegd omwille van dat haar
En omda Rabe Spiere tons zelve den bok ging uithangen hij was wa te straf
Der schoten haast geen Franken nie meer over en z' hen hem tons opgepakt
Uit zelfverdediging he jong hoe zoeje zelf zijn en ze deden hem ook de bol af
Allee gij, zei Zever. Be nee ik niet zei Kolder, Guilio en Tine hen da gedaan
E jamaar zei Zever, es dat tons verbeterd on die adelaers allemale weg waren
't Vliegen der toch nog altijd rond jong zei Kolder, die bleven zomaar nie staan
Ja zei Zever hoe zoeje zelve zijn he Kolder, on ze ui bole willen afsnijden
Ge zoe gij toch ook wel willen wegvliegen zeker, ode moest keunnen vliegen
Da es zeker dadde zei Kolder 'k zoe da vaneigens zoveel meugelijk vermijden
Maar ja 'k he geen vliegbrevet he jong, waar zoe 'k ik naartoe moeten waar
Ge moe nie schui zijn zei Zever, we weunen hier toch in Frankrijk niet he vent
Ja ga der ook maar nie naartoe zei Kolder, on ze ui zo zien mee ui boterhaar
Dan steken ze ui misschien ook in een voliëre, haja voor al die boter he man
Of voor al da stroot en die konijnekeutels die daar aan die twijfeltoren liggen
Jaja jaja zei Zever he da goe gezien vent 'k moe 'k ik opassen jajaja da kan
Maar 'k peize niet dat daarvoren naar hier zoen komen zei Kolder zo verre
Jamaar pas op zei Zever Napolidinges he hier vroeger ook nog geweest hoor
Kweet nui nie waarom maar diene gast kreeg dat zomaar ineens in zijn sterre
Ze zaten hier rond te huppelen gelijk gelijk van die penquins van de noorpool
Kweet nui nog niet wa dat ze hier hen weesten doen, maar nui zijn ze weg
Hja zei Kolder ze waren misschien de weg kwijt he en waren ze op den dool
Da kan zei Zever, heja ze koesten misschien geen Belgisch he, jaja da kan
Hja ze moeten maar naar geen vreemd land gaan he en België es zo groot
Echt he vent, haja 'k wede 'k ikkke hier zelfs nog nie overal de weg he man
E 'k kanne da geloven zei Kolder ik verdole altemets zelfs in mijn huis waar
Zo groot dat da es he vent, mijn wijf moe soms vree zoeken om mij te vinden
Gisteren zocht ze mij overal he vent en nie te vinden, 't was partangs klaar
Ze riep altijd maar da'k den bairput moest uitzetten en echt ze vond mij niet
Ik hoorde ze wel roepen zalle maar 'k vonne mijne weg niet tot bij haar he
En azo koeste'k mijne bairput nie uitzetten he tot mijn eigen groot verdriet
Hja zei Zever he soms van die grote ruines he, maar allee 't es toch ne thuis
A geweet het zei Kolder, 'k zoe nie gairen in azo een hudeken weunen hoor
Gelijk in Kafrika, der ziten zelfs nog wilde beesten gelijk een rat en een muis
Maar ook van die beesten mee vier handen he, rare kwasten zijn dat daar
En een paar van die grote katten, den een zeg ter Leeuw tegen de ander Leon
Op ne zekere da was Leon daar aan 't wandelen een op vier poten dan waar
Pakt hij daar toch wel een wildebeest zeker, maar ja hij had daar mee genoe
't Ware slechter geweest had hij een oliebeest gepakt, hij kreeg da noeit op
Haja zei Zever die beesten met azo ne trompetneuze ze doen azo toetertoe
En macht dan die beesten hen die lopen hele dagen mee bomen te smijten
En ze fretten alles op da ze tegenkomen, bananen appelsiens en ananassen
En z'hen daarom grote tanden he omdat ze van al da eten te zere afslijten
En 't schijnt zei Kolder dat daar beesten weunen met ne vreende lange nek
Hier af, noemen ze da geloove 'k ikke, da wil zeggen het eten es hier op he
En tons moesten ze hoger kijken he anders hadden ze niets voor in hun bek
Ze eten eerst alles op beneen en tons altijd maar hoger tot zelfs in de bomen
En azu altijd maar hoger en hoger, heja 't was alle stappen, van hier af, waar
Tot slot kregen ze azo ne langen nek he, haja waar vent azo es da gekomen
'k He ne keer azo een gezien, zijn nek was zo lang daje zijn kop nie kon zien
Zo hoge zat hij me zijne kop, o thij dorst had dronk hij gewoon van de wolken
Tja vent Zever da was dan ook een uitzondering he azo lopen der geen tien
Ja 'k kan 't geloven zei Zever want 'k he der nog noeit één gezien, nog noeit
Dat nie ware dat zo warm es, of 'k paktige mijne velo om eens te gaan kijken
't Es nui al een pooske geleen, misschien es thij nui nog langer gegroeid
In azo'n were zeker zei Kolder zijde zot ja, der es niets da lastiger es waar
Azo altijd maar terten he jong en die zonne azo op uine kop schijnen he
En ge moe daar ne witte helm voren hen he en gij zijt hier azo in ui haar
Gelijk dadde zei Zever maar ja waar tevoede gaan es ook nie alles he zeg
Dat es ook waar zei Kolder, en odde tons azo op ene van de slekken tert
't Zitten der daar van twintig meders he vent, zo hap en ge zijt meteen weg
Jawadde zei Zever, en die lopen daar maar vrij rond, o da nie gevaarlijk es
Och die mensen zijn da ginder geweune jong zei Kolder, 't es dagelijkse kost
Ze worden zij dikwijls opgegeten maar ze snijden ze tons open met hun mes
Dan ze daar moesten naar kijken der zoen ginder geen mensen meer lopen
't Zijn daar zelfs kampioenschappen om ter rapst opgegeten worden waar
En ja he tons snijden ze natuurlijk ook om ter snelst die slekken weer open
Ze maken tons sjakossen van ulder vel he, van die slekken he begrijpte wel
Op ne keer was ter toch een vergeten van zijn slekke open te snijden zeker
En voor ze er goed erg in hadden hadden ze sjakossen gemaakt van zijn vel
Hja zei Zever dat es natuurlijk een werkongeval he da kan overal gebeuren
Veronderstel da dat hier zoe gebeuren zeg, lijk mee mij nui bijvoorbeeld zeg
'k Zie 'k ik mijn vrouwe al mee een sjakosse mee mijn tatoeage rondsleuren
Ja jong zei Kolder ne mens mag daar nie op peizen he maar 't he voordeel
Hja zei Zever wa voordeel es daar nui aan verbonden, hangt daar te bijzen
En he tons eindelijk ook ne keer geld bij ui waar en da gebeurt ook nie veel
Dat es just zei Zever maar zoverre haek nog nie gepeist, maar ja he gelijk
Al he 'k ik eigenlijk geen geld tekord hoor, mijn koolkot ligt er vol mee waar
Hja zei Kolder 't zal allichte zwart geld zijn he azo spelen der ulder vele rijk
Maar wa moe ne mens daar allemaele blijven mee doen he, al die zorgen
Ge moe da allichte zo van tijd eens verscheppen om niet te beschimmelen
Och 'k geve der allemets een keer kerre weg zei Zever, vroeg in de morgen
De mensen staan soms uren lang aan te schuiven ok zo aan 't uitdelen ben
A zei Kolder 't es van uiend da mijn wijf mee al da geld komt de laatsen tijd
E 'k he der eigenlijk nie op gelet zei Zever hoewel ik haar partangs goe ken
Maar ja ode azo hele dagen mee geld smijt edde daar geen erg in he jong
Ne kortwagen alhier en ne kortwagen aldaar, 't es de eene na de andere he
Lijk gisteren ook vent na al die uren geld scheppen had ik een droge tong
'k He twaalf flessen champagne moet drinken eer mijnen dorst over was
Vroeger dronk ik altijd zoete drankskes he vent en zonder alkohol natuurlijk
Emmers mee te keer waar voor mijnen droge lever, en altijd zonder glas
Haja 'k vonne nergens een glas waar dat er nen emmer sappekes in kon
Ik moest e ne keer overgeven he vent en 't waren allemaal suikerklontjes
Ne helen hoop suikerklontje vent en die lagen daar te blinkenn in de zon
En tons ben ik overgestapt op Champange waar, maar da steekt ook tegen
Snachts he vent borrelen die blaaskes uit mijn oren tot de kamer vol hangt
Maar 'k ben de laatsten tijd wa verminderd, nui drink ik er nog amper negen
Hja ne mens kan nie voorzichtig genoeg zijn mee den drank jong zei Kolder
Ik ben azo ne keer zat van weg van mijnen trap gevallen, e ja zat newaar
Ge weet mijnen drank sta alrijd boven he en 't es ook ne hele hoge zolder
Mis ik toch wel de bovenste tree zeker, en ik maar rollen uren achtereen
'k Zei het al da'k ne hoge zolder he waar, en ik maar rollen altijd maar deur
En op de laatste tree he vent bleef ik aan de leuning hangen mee mijn been
'k He natuurlijk subiet gecontroleerd of da ter niet aan mijnen trap was waar
Haja azo puur gouden trappen, ne mens moet daar een beetje zuinig op zijn
Gelukkig da 'k ik niets mankeerde allee maar een beetje verstreuveld haar
'k Ware just Strijn Steuvels ge kent dien gast toch he mee zijne stijve snor
Da gelove'k nogal zei Zever 'k he der nog mee gebolt, al est al wa geleen
He thij daar ook ne keer geen een gedicht geschreven over nen watertor
Of was dat dienen halve pletsekop allee hoe hetege den dienen ook were
't Was partangs nen bekenden zulle, ge weet wel mee zijn waterschrijvers
Hij was gairen gezien bij de mensen 't was een vreende gezelle-ge pere
Da kan zijn zei Kolder maar ik geve eigelijk nie veel om al die krullewieten
Lezen es mijne beste kant niet, ik kanne mij daar nie mee bezig houden
Ik ben meer zo'n ruwe bast he de wilde natuur van jagen en van schieten
Op azo ne zeker keer was ik weeral mee mijnen schonen tweeloop op jacht
'k Hae al enigen tijd ne koekoek ghoord, en da werktige op mijn zenuwen he
Plots hoordige'k hem were waar van achter mijn rug 'k hae da nie verwacht
In ene ruk draaidige 'k ik mij omme en pardaf he vent hij was ter geweest
Mijn wijf was razend van kolere waar, nui wist ze niemeer hoe laat het was
Maar da mijn wijf der zomaar opeens uittrok dat paktige mij toch het meest
E jamaar zei Zever ui wijf es toch were bij ui, es ze vree lang weggebleven
Hoch een ure of dreie zei Kolder, en ineens was ze daar were mee ne lach
En ook mee een koekoeksklokke waar ze mijn tweeloop ha voor gegeven
Zever schaterde het uit ja vent op die wijven keunde niemeer vertrouwen
Ze zoen ui verkopen waar ge der bijstaat, maar ze keunnen toch goe koken
En ook vent zei Kolder ge zijt daar gewoon aan geraakt en ge wilt da houwen
'k He net een nieuwe bijl gekocht, haja ne mens he altijd een 't wa te kappen
Den één of ander dag heje da toch ne keer nodig he en tons staat da klaar
'k He al gesnoeid mee een pennemes en da gaan ze mij niemeer lappen
Onze kapper hae da ghoord en hij vroeg of hij ze ook eens mocht gebruiken
Sedert tons he vent es ter gene mens meer die daar nog mee zijn haar gaat
En ja wat es nui 't gevolg al de mensen lopen nui me van die lange pruiken
Zijn wijf es ter vandeure en zijn klanten ook, en hij he die bijl niemeer nodig
Hij he ze nie eens gebruikt ze es nog lijk splinternieuw, die stond daar maar
Nui dat hij alleen es wilt hij niets meer kappen he die bijl es nui overbodig
'k He ze dan maar weest weerhalen waar, hij was blije dat hij ze kwijt was
Allee zijn wijf he, azo keunt hij op pensioen gaan, van heur mocht hij niet
En 't es gedaan mee kappen hoor nui drinkt hij regelmatig een goed glas
Diegene die nui nog mee zijn haar gaat es bij de begrafenis ondernemer
Al trachten ze da natuurlijk zo lang meugelijk uit te stellen, mee ulder haar
Maar er es geen ontkomen aan he, zijde gij nui rijk of arm of ne bohemer
Mee ulder haar gaan ze allemaal ne keer he vroeg of laat en tot hun spijt
Ge meugt zijn wie ge wilt schoon of lelijk maar op ne keer est toch gedaan
Maar 't es ook gedaan mee jagen voor ui zei Zever ge zijt ui gewaire kwijt
Och 'k he mij der al lang een nieuwe gekocht zei Kolder, een schone hoor
Recht uit Kamerika, speciaal gemaakt voor mij, geen kogels he maar hagel
Da he een breder schotsveld he, ge moe haast niemeer mikken daardoor
Ge smijt er gewoon naar mee ui gewaire en ze vallen al dood van 't verschot
Al de veugels van twintig meters in 't ronde vallen daar voor ui voeten neer
Ze zijn zelfs al gepluimd he en de builing es ter al uit gereed voor in de pot
Hja 'k he der ook meer of een miljoen voor betaald he, en dat es veel geld
Nie iedereen he ze zo voor 't rapen gelijk te 'k ikke he, azo es dat he vent
Jaja dat es wel waar zei Zever, 't es veel geld maar 't es resultaat dat teld
Maar ik jaag altijd mee mijn blote handen he, kware overlaatst ook op pad
Mee da mes in mijn hand mee maar éénen duime waar, en ik zag daar wat
Ik sloop er vorzichtig naartoe he en da beest he nie de minste kans gehad
E jamaar hoe koeste gij da mes vasthouden mee enkel maar nen duim zeg
Jamaar der zaten ook nog vier vingers aan he zeg, allee wa peisde gij wel
En ge moe mij nie in de rede vallen he Kolder of da beest es nog op tijd weg
Dus ik sprong er naar toe gaf het ne klop in zijnen nek en sneed zijn keel af
Jonge jonge zei Kolder, en azo mee ui blote handen, ge durft gij nogal hoor
'k Moe eerlijk zeggen dat da een staaltje van jachttechniek es, dat es straf
E da gelove'k zei Zever, en sanderendaags hemme konijnenvlees gegeten
Hja zei Kolder na azo ne klopjacht he ne mens een stukske vlees verdiend
Mijn wijf zei Zever, beloont mij daar tons altijd mee ze zal da noeit vergeten
En 't es best ook zulle, ze weet wel wie dat er baas en bij ons, ik natuurlijk
Ok bijvoorbeeld zeg 'k gae hout kappen dan kap ik hout en ze piept niet hoor
Ze weet wel da ze moe zwijgen tegenspreken tegen mij es heel avontuurlijk
Gisteren zei ze nog dat ik onmiddellijk om boter moest gaan naar de winkel
De boter was op en straks moest ze boterhammen smeren, maar azo nie he
Peisde gij dat ik dat deed, daar was geen denken aan he, ik ben gene kinkel
Vijf grote minuten he 'k ik nog gewacht, 'k doe 'k ik gewoon mijn eigen goeste
En expres deed ik dat he zuiver om te laten zien wie dat er baas was waar
Just alleen maar omda ze zei inmiddelijk he, en omdat ze zei da'k moeste
Jamaar he groot gelijk zei Kolder, ne mens moe nie op zijne kop laten zitten
Die vrouwen zoen anders wel peizen dat ze ook iets te zeggen hen he vent
De mijne zei ne keer op nen dag dat ik tsachternoens de kelder moest witten
Maar da paktige niet hoor, nie mee mij he zeg, ik doe wa da 'k ik wille hoor
Ik lade mij door mijn wijf de wet nie lezen zulle, nee da moe ze nie proberen
Voor heur te treiteren hek het 't voornoens gedaan, ja hoor expres daarvoor
Peisde gij da ze daar een woord over gezeit he, nee hoor ze he gezwegen
En 't was nodig ook, of 'k wittige hem nog ne keer, azo benne 'k ik he vent
Ze was zo schui van mij da'k tsachternoens gelei op mijn stutten he gekregen
Ja jong zei Zever we moeten op ons poten staan he, anders vallen we omver
Aan wie zegdhet, vallen kan gevaarlijk zijn hoor, ik viele ne keer van een lere
Kwildige just bananen gaan plukken he, en ineens pardaf boem op mijn ster
Uitgesloren op een banaan he ne mens moet algelijk oppassen oje iets doet
Der was een banaan blijven liggen op een spurte waar, en 'k hae 't nie gezien
Jawadde zei Zever, over een banaan tons nog eje ui zere gedaan of gebloed
Be neek vent 't was just van de onderste spurte he in de bananen waar man
Want 'k hae der al nen hoop afgetrokken he, jaja die sjanse had ik toch nog
Maar 'k hae toch lelijk verschoten hoor, haja ne mens verschiet daar toch van
He nog sjanse zei Zever het koesten anders ook kokosnoten geweest zijn
Zie dat er azo één op die spurte lag ge zoe nogal ne gank gegaan hen he
Azo boven op dienen hoop kokosnoten, jonge dan deed dat zeker veel pijn
Dat es nog niets zei Kolder best dat het geen boom tomaten waren he man
O ter azo een op die onderste spurte moest liggen 't ware van zwiep waar
Boef in die hoop tomaten en twas al ketsup en ik zo rood als het maar kan
Ja vent zei Zever ik kroop azo ne keer op de duivelare waar vol mee duiven
Da was daar een gekoer he vent mijn oren gingen er van tuiten op den duur
't Zaten er zo veel dat er geen plaats meer was en ik begon er af te schuiven
En wete gij waarin ik terecht kwam, wa voor hoop lag ter daar op de grond
Nen hoop gepluimde duiven zeker zei Kolder, wa zoe ter daar anders liggen
Ja be ne vent was het maar da geweest waar, ne groten hoop duivenstront
Ondanks dat het eigenlijk maar grollen waren schaterde Kolder het vrolijk uit
Da zoek tochwel ne keer hebben willen zien he zeg, kzie ui daar al liggen
In die gulliano, azo nemen de vogelmest toch, mee uinen betaderde snuit
Gij keund er algelijk naar slaan zulle vent, voor iemand die zo serieus es
'k Moeste der nie naar slaan jong zei Zever 'k lager er pardoes temidden in
En da was nog 't ergste niet he vent Kolder, maar dien hoop was nog ves
Dat es ook raar he zei Kolder wij zeggen ves tegen vers, dat es streekpraat
Ik zegge daar niets tegen zei Zever, want ik hem nog noeit tegengekomen
He misschien nog noeit in de praatstreke geweest zei Kolder nui es't telaat
Hij es verhuist naar elders da ligt ergens buiten maar waar weet ik niet hoor
Ja ik hoor het ook niet zulle zei Zever, elders maakt allichte nie veel lawaai
En 'k ga der nie achter gaan zoeken ook daar make'k mij nui nie moeg voor
Hja 't leven es al lastig genoeg he Zever, azu alle dagen wandelingen maken
En azu af en toe ergens wa gaan zitten om te rusten en de natuur opsnuiven
Tons were rechte kruipen, we moen wel he of we zoen niemeer thuis geraken
Ja jong Kolder ons vrouwen onderschatten dadde, want ze zijn zij lekker thuis
Azu op ulder gemak wa schuren en dweilen en een beetje de waste slaan
Wa breien en kousen stoppen eten maken en het stof afdoen in hulder huis
Ja en zalig den afwas doen zei Zever, ze weten nie hoe goe dat ze het hen
En wulder maar wandelen en vertellen, ze weten nie hoe lastig dat da es he
Ik zei het nog laatst tegen haar, wijveke ge weet niet hoe veel ik ui verwen
En zoede geloven da ze tons nog nie geloofde, ze lachte mij vierkant uit
Ne luizigen straatloper zijde gij lachte ze, en ik kreeg tons nog ne zoen
Hierzie voor da ge weg gaat de lere op en kuist nui eerst ne keer die ruit
En wa moest 'k ik doen he vent, mijne rugge doet er nog altijd zere van
Een hele ruide zei Kolder, edde die gans gekuist azu in ene keer, vent toch
Vaneigens zijde daar ziek van, maar 'k verstae da ne mens doet wat hij kan
'k He ook ne keer een ruide gekuist he, zo lang he de kwam geen ende aan
Jamaar zei Zever ons ruide ha ook geen hende aan hoor zelf geen onderlijf
Anders konden we der nie deure kijken he omme der voren zouden staan
Jamaar zei Kolder ge koest ze toch wa opzij schuiven gelijk een gordijne
Ja on da geweune henden moesten zijn tons wel zei Zever maar de die niet
Mijn vrouwke koopt genen brol voor mij zulle alleen van die hele hele fijne
Olala zei Kolder en edde gij nui ook zo'n fijne henden aan ik zie da lijk nie
Vaneigens ziede geen lijk zei Zever ik ben nog nie dood ik leve nog wel he
E maar 't es nog waar ook zei Kolder, allee hoe da 'k ik da nui nog maar zie
Da komt deur die fijne hende he vent zei Zever, ge ziet die geweune niet waar
Zo fijne es ze, en omdat ge die hende niet ziet, ziede mij natuurlijk ook niet he
Edde nui van ze leven zei Kolder, echt he vent nui worre 'k ik ui maar gewaar
'k He al heel den tijd gepeist dak tegen mezelf liep ta babbelen allee zeg
Ik beginne honger te krijgen zei Zever, 'k zoe wel een paird keunen verslinden
Awel 't staat daar een boerepaird zei Kolder eet dat op anders loopt het weg
Da gae niet he vent Kolder, diene mens he da nodig om zijn land te ploegen
Ik wille dien mens ook niet zonder werk zetten omwille van zijn kroostrijk gezin
Had het een wild paird geweest ja, dan at ik het subiet op met veel genoegen
Awel zei Kolder pairdevlees daar ben ik nie echt zot van, 'k worre daar wild van
't Es daarmee zei Zever dat ui wijf zegt da ge soms nog lijk nen wildebras zijt
't Is nog best daje geen leeuwenvlees eet, stelt ui voren, hoe wild worde dan
Leeuwen eten zei Kolder, nee mij nie gezien hoor mee al dat haar in hun nek
En die scherpe klauwen, allee vent Zever hoe krijgde zoiets deur ui kelegat
'k Ede tons nog liever een schelle hooflakke of een goe schelleken buikspek
En daar ze al pratend thuis waren gekomen stonden de vrouwen al te wachten
't Eten staat gereed zulle straatlopers keunde nie wa eerder naar huis komen
Oei est al zo lade zeiden de schavuiten, mens, 't es al later dan we dachten
De vrouwen trokken een oogje naar elkaar, daar keunde toch nie op bouwen
Ge zoe toch geen huis op onze rug willen zetten zeker zei Zever als verweer
De vrouwen schaterden het uit, allee, 't es best dat we veel van ulder houwen
Allee tegen gisteren he Kolder, we keunnen misschien eens wandelen gaan
De vrouwen schudden eens lachend hun hoofd sjonge als die twee samen zijn
Maar ach ze hebben maar dat te doen, op pensioen he, laat ze maar begaan

Louis Victor